Tula Para sa The Best Kong Tatay (A Father’s Day Special Poem)

Sa makulay na mundo ipinagkait ang liwanag

ni hindi nasilayan ang wangis ng magulang

tanging haplos ng palad ang siyang kasangkapan,

upang maramdaman ang sa kaniya’y nagsilang.

Sa buhay ay nagpatuloy kahit na may hirap

hindi nagpatinag patuloy na nagsumikap

para sa pamilya kapansana’y niyakap

hindi nagreklamo, lumaban nang patas.

Para sa’yo aking ama pangako’y hindi magmamaliw

‘di ka pababayaan pananatilihin ang aliw

bilang bawi sa sakripisyo mong ginawa

sa haplos ng ‘yong kamay buhay nami’y guminhawa.

Ikaw ang nagbigay ng liwanag sa kabila ng ‘yong kadiliman,

Ilaw na aming tanglaw hanggang sa kasalukuyan,

kulang ang salitang salamat upang ika’y parangalan,

walang hanggang pagmamahal ang sukli namin sa’yong kadakilaan.