Sino S'ya?

Nasilayan ko ang taglay n'yang wangis,

nangungusap ang mga mata ngunit sa lungkot—nakabigkis,

kulang s'ya sa saya ngunit sa ipinakikitang ngiti—lumabis!

Mapagkunwari! Subalit hindi ito malinis.

Nabanaag ko s'yang nakatayo sa salamin,

huminga nang malalim at tila may bibigkasin,

"wala akong kwenta sa lahat, paumanhin,"

sumapat iring bulong upang ilabas ang saloobin.

Hindi n'ya napigilan—tumulo na ang luha,

ngunit nang buo kong kinilatis ang kan'yang mukha,

may napansin ako't may naalala bigla,

ako nga pala at s'ya ay iisa, tama, kami ay iisa nga.