Si Leron ay Sumisinta

Leron‚ Leron‚ sumisinta || buko nito ay pulbura;

Dala-dala mo ay buslo || sisidlan mo ‘to ng droga‚

Pagdating sa inosente‘y || masigasig— inaalok‚

Kahit kapos-kapalaran || humihithit pa sa sulok.

Naligaw ka na ng landas || naaliw— naging mapusok;

Naadik— ayaw tumakas || ‘kaw ang lider‚ nasa tuktok‚

Leron‚ Leron‚ sumisinta || sinisinta mo ay iba;

Dala-dala mo ay buslo || nakaabang ang pangamba.

Leron‚ Leron‚ gumising ka! || huhulihin ka ng pulis;

Bitawan mo na ang droga || sumuko ka na nga! Bilis!

Dala-dala nila‘y baril || ‘wag nang balaking tumakbo;

Baka buhay ay makitil || tapos kinabukasan mo!

Ang sisidlan ay kulungan || subukan mo ngang magbago;

Kilalanin— Panginoon || talikdan nakaraan mo‚

Hindi pa huli ang lahat || sa landas— ‘wag nang lumihis;

Leron‚ Leron‚ sumisinta || iwaglit ang droga‚ bilis!

(||)— Gabay sa pagbasa

--Nerelyn Fabro

Nerelyn Fabro, 17 taong gulang. Nilalaro ko ang mga salita kapag pinaglalaruan ako ng mundo. Halimaw man ang delubyo, wala itong laban 'pagkat pluma ko'y hindi nagpapatalo!