Si Ina at ang Kaniyang Disiplina
Tumatangis itong ina sa pambababoy ng anak,
dumadaing sa sakit at dugong dumadanak,
inabanduna matapos pakinabangan taglay na kagandahan,
inaabuso ng tao si Inang Kalikasan.
Hinagpis niya'y sumpa na sa marami'y papatay,
sisingilin ang utang pambayad ay buhay,
sa pagsira sa kabundukan matitibag ang lupa,
basurang ikinalat—mananalanta ang baha.
Magbalik ka sa piling ni ina, pangalagaan ang likas nating kayamanaan,
mahalin at ingatan nang hindi tayo pababayaan,
sa panahon ng tag-init ay mayroong masisilungan,
sa oras ng taggutom may bungang kahoy na maaasahan.
Pangungulila ni ina ay ating wakasan,
akaping mahigpit—obligasyo'y 'wag takasan,
kalusugan niya ay mahalaga, ito'y ating kaligtasan,
sa panahon ng taghirap nasa kaniya ang kaginhawaan.
Comentarios