Pinipintig na Pakay

Pinitas ko ang mahiwagang salita sa makulay na hardin;

sinimulan kong pasayawin ang pluma sa tugtog ng damdamin.

Hinuli ko ang lumilipad na tugma gamit ang sabik na kamay;

ang patay na paksa sa libingan ay binigyan ko muli ng buhay.

Dinama ko ang pintig ng puso kong pinasukan ng kaba.

Tumayo ako sa entablado kasama ang tulang inihulma;

naluha ako nang maalalang ito ang pangarap ng nahimlay kong ina,

kaya ang pinipintig kong pakay ay manalo at maiuwi ang medalya para sa kaniya.