Pagsuong sa Bulahong Hapila

Tarundon man patungo sa Iyo'y isang daang lubak-lubak, bulaho't puno ng balakid,

Pananampalataya'y panghahawakan; aking matatag na sandigan sakaling mabulid.

Tulad ng makapal at matibay na tsinelas na proteksyon sa 'king sensitibong talampakan,

Paniniwala ko'y isang kalasag na mag-iingat; dumatal man ang unos hindi ako panghihinaan.

Subukin man ng delubyo ang tinatahak kong landas sa 'king paglalakbay,

Makarating lang sa kandungan Mo Panginoon handa akong magpasakit at itaya aking buhay.