Minamahal na Maestra
Sila — na nagsisilbing tulay para sa ating pangarap‚
ang nagtutulak‚ ang nangungumbinsi para tayo’y magsumikap.
Nagsosobra man sa pagiging strikto ngunit sa pagtuturo ay hindi nagkukulang‚
sila ang bayani‚ ang gabay at pangalawang magulang.
Madalas silang mag-utos na ilabas ang panulat at kwaderno‚
at kung pasusulatin ng mahaba‚ tayo’y nagrereklamo‚
ngunit ito pala’y pundasyon ng pag-ipon sa kaalaman‚
kahit nalilimutan natin na sila’y pasalamatan.
Lagi man tayong naiinis kapag may pagsusulit na mahaba‚
o kahit sa aktibidad at proyektong pinapagawa‚
ating isipin na ito’y sakop ng buhay bilang estudyante‚
sa pagpapaunlad ng katauhan‚ ito’y ating haligi.
Minsan man ay mapapansin na sila’y namamaos‚
pero asahan pa rin na magtuturo nang maayos.
Kaya marapat lamang bigyan ng paggalang at respeto‚
’pagkat sila ang dahilan ng malawak na pagkatuto.
Mas higit ang binibigay na oras sa atin kaysa sa sariling pamilya‚
sa madilim nating kinabukasan‚ sila ang naging bombilya.
Kaya huwag kalimutang pasalamatan at bigyang pagkilala‚
ang ating mga guro — ang minamahal na maestra.
😇😇