Kabutihan sa Likod ng Kasalanan

Saulado na ang pasikot-sikot sa trabahong delikado,

pilit mang patigilin ngunit sagot ay "ayoko."

inosente ang mukha ngunit sa kalye'y barumbado,

bulakbol sa eskwelahan ngunit sa pagnanakaw edukado.

Suki na ng pulis at palaging napoposasan,

doon sa DSWD, mistula ng tahanan,

ngunit kapag nakalalabas, nababaliw sa kasalanan,

uulit-ulitin, binabalik-balikan.

Ngunit sisiga-siga man sa dinaraanan,

may inosente pa ring puso at isipan,

kamalian man ang natatanaw,

may damdaming mapagmahal din ang nangingibabaw.

"Nay, may isandaan po akong nakupit,

bunso, ito gamot mo sa 'yong sakit,

18 na ako, magbabagong-buhay na sa kulungan,"

ito ang liham sa mesa na kaniyang iniwan.