Daluyan ng Pag-asa

Ang lahat ay biglang nabalot ng takot at kaba

Tumigil ang mundo at nawalan ng buhay ang kalsada

Sinubukang ilayo ang sarili, minamahal at pamilya

Papalayo sa sakit na hindi mo alam kung na sa'yo na

Huminto ka't napaisip na tila wala nang babalikan

Umuugong ang pag-aalala na wala nang kinabukasan

Masigla ka nga pero pinanghihinaan ka ng loob

Hindi makatulog ng taimtim, iba-iba na ang kutob

Sa gitna ng mga ito, may isa tayong Panginoon

Sa bawat dumadating na unos ay mayroon Siyang tugon

Batid Niya na tayo'y humihingal na sa sakuna

At kailangan na natin ng tulong mula sa Kaniya

Ipagdasal ang sarili na ika'y maging daluyan

Daluyan ng ngiti't pag-asa na sa iba'y nauubusan

Daluyan ng tulong upang iba'y masiglang makaraos

At maging ilaw ng pag-asang hindi nauubos

Halina't unti-unting umahon sa gitna ng krisis

Ang ating lakas ay tipunin sa isang mahigpit na bigkis

Ang alab ng dasal ay ating i-alay para sa lunas

Silaban pa ang pusong pagtulong para sa iisang Pilipinas

...

First posted on Youtube - Neil Gregori Garen