Buhat
"Hindi mo makakaya ang laban ng malalakas,
pagsali mo sa weightlifting, oras ay mawawaldas.
Hindi mo magagawa kaya ba't ka susuportahan?
Sa babae mong katawan, mahina ka naman!
Wala kang pag-asa, mag-ensayo ka man palagi,
sa tunay na kompetisyon, 'di ka magwawagi."
Ngunit sila'y napahinto, biglaang napanganga,
nang mapanood sa telebisyon ang malakas na dalaga.
Binago mo ang paniniwala, nilinis kanilang isipan,
pinahanga ang mundo sa angking kalakasan.
Pinamuka mong babae man, hindi dapat maliitin,
'pagkat tulad mong dilag, pinatunayang may ibubuga rin.
Pinamangha mo ang tao'y dating nanghuhusga,
sumuporta ang dati'y nagsabing 'di mo makakaya.
Bumaliktad ang mundo, dati ika'y pinapabagsak,
ngayo'y sila na ang puspusang pumapalakpak.
Bitbit mo sa kamay ang bigat ngunit nilalabanan,
naniwala sa sarili para na rin sa sariling bayan.
Nagbunga ang pagod, nagbunga ang pag-eensayo,
kahit pa ang mga palad ay puno na ng kalyo.
Gintong medalya'y kauna-unahan mong iniuwi,
nag-iisa ka lang ngunit milyon ang 'yong napangiti.
Sumasaludo ang lahat sa 'yong ginawa,
mayaman man o mahirap, sobra ang tuwa.
Binigyan mo ng karangalan ang bansang Pilipinas,
kaya't ang huling masasabi, mabuhay ka! Hidilyn Diaz!
...
Young Pilipinas Poetry
💛💛💛