Bituing Walang Ningning, isang tula ng inspirasyon sa buhay

Ang mga pinapangarap ko sa buhay

parang bituin sa madilim na kalangitan,

napakalayo tignan at abutin,

parang imposibleng marating

at hinahangad ng iba rin.

Madaling mangarap,

ngunit 'di madaling matagumpayan.

Parang paglusot ng sinulid sa butas ng karayóm,

nangangailangan ito ng oras at dedikasyon

upang matamo ang tunay na inaasam-asam.

Subalit ang iba ay sinusubok ng inip,

ang hindi maliwanag na direksyon ay sinisilip

ang lubák na daan ay nilisan

mga paa'y patungo sa nagbabalatkayong patibong

pag-angat ay mas nahihila palubog.

Oh kay hirap nga namang matamasa

pero ang bawat hakabang ay pagkapit sa pag-asa

mga sakripisyo ay magdadalit ng kaliwanagan—

ningning ng napasakamay na hiraya

pagkat proseso'y pinagkatiwalaan.