Bidyukol

Selpon lamang ang tanging komunikasyon ng mag-asawang sina Fred at si Rose na nasa abroad upang magtrabaho. Long distance relationship sila kung paiikliin.

Martes noon ng gabi, nagpaload si Fred sa tindahan upang makapagvideo call sila sa messenger.

"Kumusta ka mahal?" Panimula ni Fred na bagong ligo habang hinahagod ang kaniyang buhok.

Agad namang napakapit sa bibig si Rose na ikinataka ng asawa.

"M-may m-multo sa likod m-mo, n-nakangiti," pautal-utal pang turan nito dahilan upang tumingin sa likod sa Fred na halatang natakot.

"HAHAHAHA it's a prank!" Hagalpak ni Rose na may kasama pang pagtakip sa bibig.

Ngunit nanatiling tulala't takot si Fred at lumaki pa ang mga mata. Kitang-kita niya kasi sa video call ang pinatay nilang anak noong isang taon—puno ng dugo, nakangiting nanlilisik ang mga mata at may hawak na kutsilyo.

Sinaksak nito si Rose habang nagmamakaawang sumisigaw ngunit agad ding binawian ng buhay.

"Isusunod kita, humand—" bigkas ng anak na naputol din bigla.

"Panaginip lang pala, hay salamat." Nakahinga nang maluwag si Fred ngunit pagtalikod nito sa kama ay...

"Kumusta, aking ama?"