Baitangang Tapak ng Dustâ

Pasan-pasan yaong napakabigat na talampakan ng dustâ,

na wari'y dambuhalang 'di katakot-takot, 'di taong bahagdan,

'di na iri makakiwal—makapalag,

parang may kalawanging tanikalâng 'di magalaw.

Tikís iring pagtindig-pasulong,

pagtapak sa pagkatao'y kasinkí ng kubang inapi ng lipunan,

pang-aalipusta'y ginagapi ng laksá-laksáng ulupóng,

para mapawálang-bahala ang kaawa-awang gumigibík.

Abusadong 'di makataong kapwa sa yaring lipunan,

sa ka-isang uri'y tila halimaw kung mangdustâ,

pero oras na para ang pusikit na lunggati nila'y 'di hahayaang manaig,

ililigtas natin ang kapwang tinapakan ng mga alipusta!

-- a poem by Colin Cris Celestial

Colin Cris Celestial is an 18-year old writer from Talipan, Pagbilao, Quezon Province.