Ang Tula para sa Pagbabago
Matulog ka sa tanghali at huwag munang maglaro‚
ikaw ay tatangkad kung susunod nang matino.
Huwag nang subukang umalis at dahan-dahang tumakas‚
dahil binabalak mo pa lang‚ nakahanda na ang tsinelas.
Kung may kasalanan kang nagawa‚ lumuhod ka sa munggo‚
samahan mo ng dasal hanggang abutin ng ala singko.
Mangako kang ang kasalanan ay ‘di mo na uulitin‚
dahil kung ika’y susuway‚ mas malala ang sasapitin.
Huwag kang gumala sa malayo‚ dahil susunduin ka ng ‘yong ina‚
at kung mamalasin ka’y mapapalo ng kung anong madampot niya.
May sermon pa sa bahay at huwag ka nang sumagot‚
dahil kapag narinig ang ‘yong bulong‚ tiyak na malalagot.
Ngunit kung gagawin ang dating nakagawian‚
hindi na uubra ngayong kasalukuyan
‘pagkat sensitibo na ang puso ng mga bata‚
at hindi na tulad ng dati na disiplina’y malaya.
Kaysarap balikan panahon ni lolo at lola‚
makalumang paraaan ng paggabay at disiplina‚
lalaking may galang at mabuting kalooban‚
dahil ngayon ay nagbago at nakaraan ay ‘di na mabalikan.
Comments