Ang Tula Para sa Bagong Henerasyon
Halika't ating limiin makalumang disiplina,
kung iisipin ay brutal 'pagkat may palo sa t'wina,
subalit 'di nawawala pangaral ni ama't ina,
istriktong maituturing sa kabutihan ang punta.
Kapag mayroong bisita huwag kang pakalat-kalat,
mamaya pag-alis nila patpat sa puwet ang lalapat,
aral na 'di maging bastos paggalang ang nararapat,
pumirmi sa isang tabi at tatawagin kung dapat.
Mayaman sa kasabihan na mayroong mga leksyon,
ang “makuha ka sa tingin” hanggang ngayo'y aking baon,
takot sa aking magulang—pinalaking may hinahon,
sagana sa bawat turo alaala ng kahapon.
Ipinagmamalaki ko na ganiyan kami lumaki,
'di sunod sa mga luho— ulo ay 'di rin malaki,
disiplinado't may galang hindi isinasantabi,
kapulutan nawang aral henerasyong hahalili.
Comments