Alam mo ba Girl? Tula ng tamang pagpili para sa hinaharap

Sa modernong pamumuhay bawat kibot ay tagisan,

tila bang may hinahabol at may nais patunayan.

Sinong mas nakalalamang ang mayro'ng pinag-aralan,

o silang 'di nakatapos na diskarte ang panlaban?

Mahaba-habang debate at walang nagpapatalo,

sa katotohana't buhay mas lamang ang edukado.

Ang sabi naman ng isa, “bawat diskarte'y trabaho,”

kung atin ngang susumahin parehong mayroong punto.

Subalit para sa akin—nararapat na pagpili,

'di na pinaglalabanan, parehong dami ng pisi.

Kasipagan at tiyaga tanging susi sa tagumpay,

at hindi ang kayabangan na atin ngang tinataglay.

Lalo na't may kumpiyansa at tiwala sa sarili,

walang hindi maabot edukado't madiskarte.

Kapwa talino at pawis at tiyaka katipiran,

bawat hangarin sa buhay ang lahat ay makakamtan.